အိန္ဒိယ အစိုးရသည် Boeing ကုမ္ပဏီ၏ စစ်ဘက်သုံး ရဟတ်ယာဉ် ၃၇ စီးကို ဒေါ်လာ ၂.၅ ဘီလီယံ တန်ဖိုးရှိ စာချုပ်တစ်ရပ်ဖြင့် ဝယ်ယူသွားမည်ဟု သိရှိရသည်။
အိန္ဒိယ၏ ကာကွယ်ရေးကဏ္ဍအတွက် အလွန်အရေးပါသည့် အဆိုပါ သဘောတူညီမှုကို အိန္ဒိယ အစိုးရက ယခုအခါ အတည်ပြုချက် ပေးလိုက်ပြီ ဖြစ်သည်။ အိန္ဒိယ ဝန်ကြီးချုပ် နာရန်ဒရာ မိုဒီသည် ယခုသီတင်းပတ်ကုန်တွင် အမေရိကန်သို့ အလည်အပတ် သွားရောက်မည်ဖြစ်ပြီး ယင်းမတိုင်မီ ယခုသတင်း ပေါ်ထွက်လာခဲ့သည်။
အမေရိကန် လေကြောင်း နည်းပညာ ကုမ္ပဏီကြီး Boeingထံမှ Apache အမျိုးအစား တိုက်ခိုက်ရေး ရဟတ်ယာဉ် ၂၂ စီးနှင့် Chinook အမျိုးအစား သယ်ယူပို့ဆောင်ရေး ရဟတ်ယာဉ် ၁၅ စီးကို အိန္ဒိယက ဝယ်ယူသွားမည် ဖြစ်သည်။ ယင်းတို့ကို လက်ရှိ အသုံးပြုနေသည့် ဆိုဗီယက်ခေတ် သက်တမ်းလွန် ရဟတ်ယာဉ်များ နေရာတွင် အိန္ဒိယ စစ်တပ်က အစားထိုးသွားမည်ဟု သိရသည်။
ယခုစစ်လက်နက် ဝယ်ယူရေး စာချုပ် ချုပ်ဆိုနိုင်ခြင်းသည် အမေရိကန်က အိန္ဒိယ၏ အဓိက စစ်ရေးနည်းပညာ အထောက်အပံ့ နိုင်ငံတစ်ခုအဖြစ် ရပ်တည်လာခြင်းကို ပိုမိုပီပြင်လာစေသည်။
အိန္ဒိယသည် ရုရှားကုမ္ပဏီများမှ ထုတ်လုပ်သည့် ရဟတ်ယာဉ်များနှင့်အပြိုင် စဉ်းစားပြီး Boeing၏ Chinookနှင့် Apacheများကို ဝယ်ယူရန် ၂၀၁၂ ခုနှစ် ကတည်းက စဉ်းစားခဲ့သော်လည်း ဘဏ္ဍာရေး ကန့်သတ်ချက်ကြောင့် ရွှေ့ဆိုင်းထားခဲ့ရခြင်း ဖြစ်သည်။ ယခုအခါတွင်မူ အစိုးရအဖွဲ့တွင်း ဝန်ကြီးချုပ်မိုဒီ ဦးဆောင်သည့် ကာကွယ်ရေး ကော်မတီက ရဟတ်ယာဉ်များ ဝယ်ယူရေးကို မီးစိမ်းပြ ခွင့်ပြုလိုက်ခြင်း ဖြစ်သည်။
အိန္ဒိယနှင့် အမေရိကန် အစိုးရများသည် ကာကွယ်ရေး ကဏ္ဍအတွက် ပူးပေါင်းဆောင်ရွက်ရန် ကိစ္စ အများအပြားကိုလည်း ယခုအခါ ဆွေးနွေးမှုများ ပြုလုပ်နေသည်။ မိုဒီသည် အမေရိကန် ခရီးစဉ်တွင် ကုလသမဂ္ဂ အထွေထွေ ညီလာခံသို့ တက်ရောက်ပြီး အမေရိကန် သမ္မတ ဘာရတ် အိုဘားမားနှင့် တွေ့ဆုံမည်ဖြစ်သည်။
“အခုခရီးစဉ်က ကျွန်တော် နောက်ဆုံး အမေရိကန်ကို သွားခဲ့စဉ်ကရယ်၊ အမေရိကန် သမ္မတ အိုဘားမား အိန္ဒိယကို ဒီနှစ် အစောပိုင်း လာခဲ့စဉ်ကရယ်မှာ အခြေချခဲ့တဲ့ နှစ်နိုင်ငံ နားလည်ရင်းနှီးမှုကို ပိုပြီး အခြေခိုင်မာလာစေမှာ ဖြစ်ပါတယ်”ဟု မိုဒီက ပြောကြားခဲ့သည်။ မိုဒီသည် အမေရိကန်သို့ သွားရောက် လည်ပတ်ချိန်တွင် Facebook ရုံးချုပ်သို့ သွားရောက်ကာ အမှုဆောင်ချုပ် မာ့ခ်ဇူကာဘက်ဂ်နှင့် တွေ့ဆုံရန်လည်း ကြိုတင် စီစဉ်ထားကြောင်း သိရှိရသည်။
_Ref: Indianexpress
No comments:
Post a Comment